Am

Gyda 2 draeth, Llandudno yw cyrchfan fwyaf Cymru. Wedi'i lleoli rhwng Pen y Gogarth a Thrwyn y Fuwch mae dewis o Draeth y Gogledd a thwyni tywod Penmorfa.

Mae gan Landudno ei chyfoeth o atyniadau modern yn ogystal â'i hanes Fictoraidd ac Edwardaidd.

Traeth y Gogledd neu draeth Llandudno yw prif draeth y dref. Mae’n draeth cysgodol gyda phier Fictoraidd hir a phromenâd eang ac yng nghysgod trawiadol pentir y Gogarth.

Pethau i’w gwneud ar Draeth Llandudno a’r dalgylch:

Does yna byth eiliad ddiflas ar draeth Llandudno!

Mae pob un o'r ffyrdd hen-ffasiwn gorau o fwynhau ein harfordir hardd ar gael yma:

•  Sioeau Punch a Judy - ffefryn gan deuluoedd ers dros 150 mlynedd
•  Reid ar gefn asyn ar y tywod
•  Hufen iâ ar y pier
•  Cerddoriaeth fyw ar y bandstand
•  Neu bendwmpian yn y pnawn yn ein cadeiriau cynfas.

Mae yna ardal chwarae, pwll padlo a byrbrydau ym mhen dwyreiniol y Promenâd.

Un o’r ffyrdd gorau o weld Llandudno yw o gwch. Camwch ar fwrdd y Sea Jay ar gyfer taith olygfaol ar y dŵr i weld Trwyn y Fuwch a'r Gogarth, neu daith bysgota môr hirach lle gallwch fwynhau’r arfordir ysblennydd yn y gobaith o ddal eich swper eich hun.

Neu gallwch gamu ar fwrdd un o'r cychod cyflym a gwibio heibio’r Gogarth a Thrwyn y Fuwch trwy ddistrych y tonnau.

Dim ond ychydig funudau ar droed yw Traeth Llandudno i ffwrdd o amwynderau’r dref gan gynnwys siopau, caffis a thoiledau.

Does dim achubwr bywydau ar y traeth.

A chofiwch, plîs peidiwch â bwydo’r gwylanod!

Cŵn ar y traeth

Gall dod â’ch ci i’r traeth fod yn uchafbwynt mawr i chi a’ch anifeiliaid anwes. Rydym ni’n eich annog i sicrhau bod eich ci dan reolaeth drwy’r amser, ar ac oddi ar y tennyn, a bod yn ymwybodol o’r cyfyngiadau sydd mewn grym ar rai o’n traethau.

Yn gyffredinol, mae traethau’n gwahardd cŵn (heb law am gŵn tywys cofrestredig a chŵn cymorth wedi’u hyfforddi) rhwng 1 Mai a 30 Medi, ond mae rhai’n gwahardd cŵn drwy’r flwyddyn ac eraill heb unrhyw gyfyngiadau o gwbl i fwynhau am dro ar lan y môr gyda’ch anifeiliaid anwes.

Rydym ni’n gofyn i chi godi baw eich ci bob tro gan ei bod yn drosedd peidio â’i lanhau ar unwaith.

I gael mwy o wybodaeth am y cyfleusterau sydd ar gael ymhob traeth, gweler wefan Cyngor Bwrdeistref Sirol Conwy.