Am

Traeth tywodlyd hir gyda phromenâd. Mae Penmaenmawr yn edrych allan ar Afon Menai ac mae’r cyfleusterau niferus yn yr ardal yn ei gwneud yn ganolfan wyliau boblogaidd i deuluoedd. Mae yno derasau wedi’u tirlunio, borderi blodau ac ardaloedd glaswelltog, caffi, arcêd a chabannau traeth ar gael i’w llogi. Mae pwll padlo ac ardal chwarae ar gael i blant. 

Mae’r traeth mewn lleoliad hyfryd ar bwynt ble mae’r môr yn cwrdd â’r mynyddoedd, ac mae’n edrych allan ar Ynys Seiriol ac Ynys Môn.

Gallwch fwynhau’r golygfeydd a gwynt y môr a mynd am dro ar hyd y promenâd, lle mae parc sgrialu i blant (a’r rheiny sy’n ifanc eu meddwl!) hefyd. Mae clwb hwylio lleol. Mae’r traeth yn un poblogaidd gyda phobl sy’n hoff o hwylfyrddio, hwylio a chanŵio.

Does dim achubwyr bywyd ar y traeth. Darllenwch yr arwyddion diogelwch wrth fynedfa’r traeth er mwyn cael gwybod beth yw’r peryglon lleol penodol.

A chofiwch, plîs peidiwch â bwydo’r gwylanod!

Cŵn ar y traeth

Gall dod â’ch ci i’r traeth fod yn uchafbwynt mawr i chi a’ch anifeiliaid anwes. Rydym ni’n eich annog i sicrhau bod eich ci dan reolaeth drwy’r amser, ar ac oddi ar y tennyn, a bod yn ymwybodol o’r cyfyngiadau sydd mewn grym ar rai o’n traethau.

Yn gyffredinol, mae traethau’n gwahardd cŵn (heb law am gŵn tywys cofrestredig a chŵn cymorth wedi’u hyfforddi) rhwng 1 Mai a 30 Medi, ond mae rhai’n gwahardd cŵn drwy’r flwyddyn ac eraill heb unrhyw gyfyngiadau o gwbl i fwynhau am dro ar lan y môr gyda’ch anifeiliaid anwes.

Rydym ni’n gofyn i chi godi baw eich ci bob tro gan ei bod yn drosedd peidio â’i lanhau ar unwaith.

I gael mwy o wybodaeth am y cyfleusterau sydd ar gael ymhob traeth, gweler wefan Cyngor Bwrdeistref Sirol Conwy.