Am

Wedi’i lleoli yng nghanol y dref arfordirol brydferth hon, mae Amgueddfa Penmaenmawr yn eich arwain ar daith drwy hanes y dirwedd, y dref a’i phobl gan ddefnyddio straeon a gwrthrychau o’r gorffennol pell i’r presennol.

Mae’r amgueddfa wedi’i gosod dros ddau lawr ac yn cynnwys dwy oriel, ystafell dawel, caffi, siop anrhegion ac ardal i blant. Mae Amgueddfa Penmaenmawr yn cynnal digwyddiadau i deuluoedd, teithiau o amgylch yr amgueddfa, diwrnodau archeoleg, diwrnodau arddangos a sesiynau crefft ac adrodd straeon i blant yn rheolaidd.  

Mae’r amgueddfa’n gofalu am gasgliad o wrthrychau, ffotograffau a dogfennau sy’n ymwneud â hanes Penmaenmawr a’r ardal leol. Mae’r casgliad yn cynnwys nifer o themâu, gan gynnwys aneddiadau’r Oes Efydd, creu bwyeill neolithig, hanes cymdeithasol a diwylliannol, diwydiant y chwarel a thwristiaeth.

Mae mynediad i’r Amgueddfa yn rhad ac am ddim.

Mae ar agor rhwng y Pasg a mis Rhagfyr (ac ar ddyddiau ychwanegol ar gyfer gweithgareddau ac fel canolfan gynnes rhwng mis Ionawr a mis Ebrill - ewch i weld y wefan am fanylion).